อิตฺถํ สุทํ อายสฺมา จิตกปูชโก เถโร อิมา คาถาโย
อภาสิตฺถาติฯ
จิตกปูชกตฺเถรสฺสาปทานํ ทุติยํฯ
3. จิตกนิพฺพาปกตฺเถรอปทานํ
[11]
‘‘ทยฺหมาเน สรีรมฺหิ, เวสฺสภุสฺส มเหสิโน;
คนฺโธทกํ คเหตฺวาน, จิตํ นิพฺพาปยิํ อหํฯ
[12]
‘‘เอกติํเส อิโต กปฺเป, จิตํ นิพฺพาปยิํ อหํ;
ทุคฺคติํ นาภิชานามิ, คนฺโธทกสฺสิทํ ผลํฯ
[13]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[14]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[15]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา จิตกนิพฺพาปโก เถโร อิมา
คาถาโย อภาสิตฺถาติฯ
จิตกนิพฺพาปกตฺเถรสฺสาปทานํ ตติยํฯ
4. เสตุทายกตฺเถรอปทานํ
[16]
‘‘วิปสฺสิโน ภควโต, จงฺกมนฺตสฺส สมฺมุขา;
ปสนฺนจิตฺโต สุมโน, เสตุํ การาปยิํ อหํฯ
[17]
‘‘เอกนวุติโต กปฺเป, ยํ เสตุํ การยิํ อหํ;
ทุคฺคติํ นาภิชานามิ, เสตุทานสฺสิทํ ผลํฯ
[18]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[19]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[20]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา เสตุทายโก เถโร อิมา คาถาโย
อภาสิตฺถาติฯ
เสตุทายกตฺเถรสฺสาปทานํ จตุตฺถํฯ